१ दिन अघि
२0८२ जेष्ठ १८ शनिबार
खोटाङ, जेठ १७
नेपाली काँग्रेसमा सँस्थापन इतर नेताको परिचय बनाएका नेता डा. शेखर कोईराला एकाएक पहिचानबादी करार भएका छन् । अहिलेसम्म कहिल्यै पहिचानको कुरा नगरेका विद्रोही खेमाका नेता कोइरालाले खोटाङको हलेसीमा शनिबार किराती समुदायको साकेला उभौलीको अवसरमा आयोजित कार्यक्रममा खाँट्टी पहिचानबादी भएको ठोकुवा गरे ।
किराती भेषको सेतो पगरी र छातिको देब्रेपछि सिलामसाक्माले सजिएका नेता कोईरालाले अब्बल पहिचानबादी भएको स्वाङ पार्दै भने 'किराँती समुदायको पहिचान, पहुँच र प्रतिनिधित्वको लडाइँमा आफु र आफ्नो पार्टी रहेको छ ।' साकेला उभौली कार्यक्रममा भेला भएका जनसमुदायलाई सम्बोधन गर्दै डा. कोइरालाले आफु किराँत सँस्कृति, सभ्यता र पहिचानको संरक्षण तथा प्रवद्र्धनका लागि प्रतिबद्ध रहेको बताउँदै नेपाली काँग्रेस पनि त्यसमा प्रतिबद्ध रहेको दावी गरे ।
‘नेपाली काँग्रेस पार्टी द्वन्द्व मेटिने र पहिचान भेटिने कुरामा विश्वास गर्छ’ कोईरालाको भनाई थियो ‘त्यो पार्टीको नेताको हैसियतले म सधैँ लागिरहेको छु ।, तपाईँहरूको पहिचान, पहुँच र प्रतिनिधित्वको लडाइँमा तपाईहरूसँगै छु र रहिरहनेछु ।’
कोइरालाले नेपाल र नेपालीको सँस्कार, सँस्कृति र सभ्यता जोगाउन नसके सभ्य समाज निर्माण हुन नसक्ने पनि बताए । हलेसी तुवाचुङजस्ता पवित्र स्थलहरू किराँत मात्र नभई समग्र नेपालीकै सँस्कृति र सभ्यताका उद्गमस्थल भएको भन्दै उनले यस्ता पवित्र ठाउँ र सँस्कृति सभ्यतालाई जोगाउन सकेनौँ भने सभ्य समाज बनाउन पनि नसकिने उनको भनाई थियो ।
हलेसी तुवाचुङ क्षेत्रको विकासका लागि आफूले सक्दो पहल गर्ने प्रतिबद्धता जनाउँदै कोईरालाले यसका लागि आवश्यक योजनाहरू अघि बढाउन जोड दिए । किराँती समुदायलाई ढुक्क भएर आफ्नो पहिचान र हकअधिकारको पक्षमा लाग्न आग्रह पनि गरे । पहिचानको अभियानमा नेपाली काँग्रेसले सधैँ सकारात्मक सहयोग गर्ने प्रतिबद्धता पनि नेता कोईरालाले व्यक्त गरे ।
