१ दिन अघि
२0८२ जेष्ठ २१ मंगलवार
उदयपुर, जेठ २०
सदरमुकाम त्रियुगा नगरपालिका ११ गाईघाटका शुभनारायण ठाकुर (बेनी) सोमबार विहान खाजा खाने पाउरोटी किन्न नजिकैको पसल पुगे । पसलेले प्लास्टीक प्याक पाउरोटी दिए, उनी लिएर घर फर्के । तर, खोलेर खान खोज्दा ढुसी परेको पाउरोटी देखियो । उनले तत्काल पत्रकारलाई खवर गरे र पसलमा आउन भने, पाउरोटी लिएर फर्केका ठाकुर र पत्रकार सँगसँगैजसो पसल पुगे ।
पसले दिनेश चौधरीलाई ‘साउजी यस्तो ढुसी परेको पाउरोटी किन बेचेको ?’ भन्दै प्रश्न गरेपछि केहीबेर भनाभन भयो । पसलेले ‘कारखानाबाट प्लास्टीक प्याक पाउराोटी आउँछ, हामीले नखोली बेच्ने हुँदा ढुसी परेको नपरेको थाहै पाउँदैनौँ’ भनेपछि कारखानालाई कारबाही गर्नुपर्छ, यस्तो सामान नराख्न चेतावनी दिदै उनी घर फर्कन लाग्छन् । त्यत्तिकैमा एक्कासी पछाडिबाट मुक्का वर्षन्छ । उनीमाथि कुटपिट गर्ने पसलेकै भतिज २१ वर्षीय प्रसान्त चौधरी र त्रियुगा नगरपालिका १२ बुद्ध चोकका ३० वर्षीय सञ्जु चौधरी हुन्छन् ।
एमाले युवा सङ्घ नेपालका त्रियुगा नगर कमिटी अध्यक्षसमेत रहेका ठाकुरले यस विषयमा अघिल्लो दिउँसो प्रहरीमा उजुरी दिएका छन् भने मङ्गलबार एक प्रेस विज्ञप्ती प्रकाशित गर्दै घट्नाको निन्दा गरेका छन् । ढुसी परेको पाउरोटी नबेच्न खवरदारी गर्दा आफुमाथि आक्रमण भएको भन्दै उनले कारबाहीको माग गरेका छन् । बजारमा खुलेआम ढुसी परेको अखाद्य पाउरोटी बिक्री वितरण हुदै आएको भन्दै उनले त्यस्तो कारखाना र आक्रमणकारी प्रशान्त र सञ्जुमाथि कारबाहीको माग उनले गरेका छन् ।
गाईघाट बजारकै व्यापारीले खुलेआम अखाद्य पदार्थ बेच्ने गरेको र त्यसो नगर्न सचेत गराउदा कुटपिट हुनु गम्भीर कमजोरी भएको भन्दै ठाकुरले विज्ञप्तीमार्फत सम्बन्धित सरोकारवालाहरुको ध्यान खिचेका छन् । अखाद्य वस्तु बेचेर समग्र उपभोक्ताको स्वास्थ्यमाथि खेलवाड भईरहेको भन्दै ठाकुरले खाद्य प्रविधि तथा गुण नियन्त्रण डिभिजन कार्यालय, जिल्ला प्रशासन तथा जिल्ला अनुगमन समिति, प्रहरी, नगरपालिका, उद्योग बाणिज्य सङ्घ र सचेत उपभोक्ताले यसतर्फ ध्यान दिनुपर्नेमा जोड दिएका छन् ।
